O Centro de Linguas presenta a súa nova oferta de cursos para este cuadrimestre

Os cursos son validables como créditos de libre configuración

Alemán, árabe, catalán, chinés, español para estranxeiros, francés, inglés, italiano, lingua de signos española, portugués, ruso e xaponés conforman a nova oferta de cursos que porá en marcha o Centro de Linguas para este primeiro cuadrimestre.

Como ven facendo dende os últimos tres anos, o Centro de Linguas organiza estes cursos pensando na comunidade universitaria e no público en xeral. O obxectivo é fomentar o plurilingüismo como ferramenta de comunicación, tanto nos ámbitos académico e laboral coma no persoal.

Entre as novidades deste ano destaca que tódolos cursos, salvo español para estranxeiros, terán unha duración de 45 horas, e estarán distribuídas en dúas sesións semanais de dúas horas, dende outubro ata xaneiro. Outra das primicias é a oferta de cursos de conversación en inglés e en lingua de signos española, que serán 20 horas e que estarán distribuídos nunha única sesión á semana.

Trátase dunha oferta ampla e moi completa de doce idiomas diferentes que se impartirán no campus de Vigo e que tamén terán presenza en Pontevedra e Ourense.

Os cursos, validables por créditos de libre configuración, abrirán a súa matrícula ao longo do mes de setembro. A inscrición farase online a través da páxina web do Centro de Linguas http://www.uvigo.es/areas/centrolinguas/index.gl.htm. Os interesados poden obter máis información no 986 81 22 50 ou ben na antedita páxina web.