Buscamos fotos e vídeos

Estamos a remozar a páxina web da Facultade de Ciencias Sociais e da Comunicación, e consideramos necesario ilustrar audiovisualmente os espacios coma as actividades realizadas no centro.
Posto que o que queremos ofrecer é unha visión da comunidade parece o máis lóxico mostrala a través da mirada de aqueles forman parte e partipan nela polo que comunicamos o interese en recibir todo tipo de formatos susceptibles de ilustrar o novo espacio web.
Aquelas persoas interesadas en aportar as súas visións poden enviar un correo electrónico a axendacsc(arroba)gmail.com.
Co obxectivo de facilitar a xestión dos correos e adxudicar as autorías solicítase o seguinte formato para a mensaxe:

Asunto:
a. fotoCSC. Para a achega de fotos.
b. videoCSC. Para a achega de vídeos.
c. audioCSC. Para a achega de formatos de audio

Autoría:
Nome de autor@s.
Titulación que cursan os autores.
Ano de promoción.
Titulo ou nome do espacio ou actividade que ilustra o material achegado.
Enlace ó material en cuestión.

A fin de que sexan máis facilmente localizables, solicítase tamén que os materiais sexan etiquetados nos repositorios en que estén aloxados coas etiquetas correspodentes fotoCSC, videoCSC, audioCSC, presentacionCSC, etc e baixo licencia creative commons ou similar.

Gracias de antemán, polas vosas aportacións.

Calendario de Exames

Está accesible na páxina web da Facultade de Ciencias Sociais e da Comunicación o calendario de exames. As datas para a realización dos exames están comprendidas entre o 22 de xaneiro e o 3 de febreiro.

Recoméndase revisar as datas para verificar posibles cambios.

Actualizaráse información respecto a adxudicación de espacios para a realización dos exames, nas pantallas da Facultade de Ciencias Sociais e da Comunicación, neste blog e nas contas do twitter e facebook.

Novos horarios da Biblioteca

A Biblioteca Central do Campus de Pontevedra, situada no edificio da Facultade de Ciencias Sociais e da Comunicación amplia os seus horarios de apertura durante as datas de exames.
Prolongaráse o tempo de apertura durante a semana e abrirá ademáis sábados e domingos ata as 10 da noite. Os novos horarios de apertura quedan como se especifica a continuación.

• De luns a venres dende o 12 de xaneiro ó 12 de febreiro, permanecerá aberta ata as 3:00 da madrugada.
• As fins de semana dende o 16 de xaneiro ó 7 de febreiro, abrirá dende as 8:00 da mañá ata as 10:00 da noite.
  

ENTREGA DE DIPLOMAS

O venres, día 9 de outubro, a Facultade de Ciencias Sociais e da Comunicación celebrou o acto de entrega de diplomas á XI promoción de Licenciados en Publicidade e RR.PP, a VII de Diplomados en Xestión e Administración Pública e a IV de Licenciados en Comunicación Audiovisual
No mesmo acto, e como ven sendo habitual, entregáronse as Becas de Honra, que este ano foron concedidas a J. Manuel Fernández Alvariño, Presidente da Confederación de Empresarios de Pontevedra, a Iván Puentes Rivera, Alcalde de Fene, e a Mabel Rivera, actriz


Igualmente, entregouse a Insignia de Ouro da Facultade ao escritor Manuel Rivas Barrós

ACTO DE INAUGURACIÓN DO CURSO 2009-10

O Decano convida a todo o alumnado e especialmente aos que empezarán no 1º curso das titulacións impartidas na Facultade de CC. Sociais e da Comunicación, así como a todo o profesorado e PAS, ao acto de inaguración do curso 2009-10, que terá lugar o vindeiro luns día 21, no Salón de Actos.


Programa do acto:
11.00 - Breve salutación do Equipo Decanal e presentación xeográfica dos centros académicos no Campus de Pontevedra

11.15 - Conferencia inaugural a cargo do profesor Xosé Carlos Sierra. Actual Director do Museo Etnográfico de Ribadavia, co título de: “O legado histórico e cultural de Galicia: imaxes e xestión”

12.00 - Benvinda do Decano e visita ás aulas e laboratorios da Facultade

Prégase a máxima puntualidade para cumprir axeitadamente o programa.

A biblioteca de Ciencias Sociais abrirá as fins de semana durante a época de exames

Tras a demanda por parte do alumnado

Ana Terceiro | Pontevedra

Esta será a primeira vez que a biblioteca central do campus de Pontevedra abrirá as súas portas as fins de semana durante a época de exames. Tras unha constante demanda por parte dos estudantes, este sábado 19 de xaneiro, será a primeira fin de semana en que os alumnos poderán acudir a este centro a estudar ou a consultar calquera información para preparar as evaluacións do primeiro cuadrimestre. Como explica a directora do centro, Laura González, “en Vigo xa fai dous anos que se empezaron a abrir as bibliotecas a fin de semana e xa entón había un interese por parte do alumnado en que se incluíran tamén nesta iniciativa aos outros dous campus” e engadiu que “Ourense empezou en xuño do 2007 e ao final acordaron incluír tamén a Pontevedra”.

O proxecto tomou forma o pasado decembro cando, con motivo da convocatoria extraordinaria dos exames que ten lugar nese mes, a biblioteca ofreceu os seus servizos durante o sábado 15 e o domingo 16, servindo de experiencia piloto para esta nova etapa. Nesta ocasión o número de usuarios que utilizaron as instalacións non foi moi elevado, pero as previsións que se fan, respecto a afluencia nesta primeira fin de semana son moito máis optimistas, aínda que a directora comenta que “tamén dependerá do tempo, porque incluso estes días co temporal non houbo moita xente polas noites”, segundo Laura González.

Unha iniciativa moi esperada
Moito tempo levaban os alumnos do campus de Pontevedra reclamando ampliar o horario de apertura da biblioteca e por fin lles foi concedido. Unha das usuarias deste centro, Lúa Piñeiro, que está no segundo curso da Diplomatura de Ciencias da Educación coa especialidade en Educación Física, comenta que “se trata dunha iniciativa moi acertada xa que moita xente non ten a opción de estudar na casa e facía falta que o fixeran”. Cando se lle pregunta a un grupo de rapazas de cuarto de Publicidade e Relacións Públicas sobre o tema, responden sorprendidas que “xa era hora”, e engaden que se debería ampliar o horario de luns a sábado, para poder facer uso non só da biblioteca senón das aulas de informática e dos materias audiovisuais.

Novo persoal e novos horarios
A biblioteca, localizada na Facultade de Ciencias Sociais e da Comunicación, abrirá de luns a venres desde as 8 ata as 3 da madrugada e durante a fin de semana de 8 a 10 da noite. Para poder ofrecer este novo horario, a institución académica dotouna de novo persoal que será o encargado de atender aos usuarios e xestionar o centro durante os próximos sábados e domingos ata o próximo 14 de febreiro.
O campus de Pontevedra conta tamén coa biblioteca da facultade de Belas Artes, a única que conta con este servizo de forma independente debido fundamentalmente a súa localización fóra do campus da Xunqueira. Neste caso o horario é desde as 8 da mañá ata as 8.30 da noite.

Galicia e Portugal unidas pola vangarda artística en Fronteiras 07

I Encontro Internacional de Artes Transdisciplinares

A Illa de San Simón e a pequena vila portuguesa de Nodar converteranse, a partir do vindeiro 16 de setembro, en anfitrionas de “Fronteiras 07”. Trátase da primeira edición dun encontro internacional onde artistas dos máis diversos ámbitos convivirán e desenvolverán os seus proxectos ao longo de 10 días. A iniciativa, que xurdiu froito da colaboración entre o colectivo galego alg-a e o portugués Binaural, conta co respaldo da vicerreitoría do campus, a Consellería de Cultura e Deporte, Concello de Pontevedra e a Fundación Illa San Simón.

O fío condutor do encontro é, como sinalou Roi Fernández, presidente da asociación cultural alg-a, “o tema transfronteirizo analizado dende perspectivas tan diversas como a social, sentimental ou a política”. Pero tamén destaca como eixe desta proposta o concepto da diversidade xa que, como apuntou o representante da asociación Binaural, Luís Costa, “a orixe xeográfica dos artistas participantes é moi diversa: España, Portugal, Venezuela, Israel, Letonia, etc.”

Na presentación do acto, que tivo lugar esta mañá, na Casa das Campás, o vicerreitor do campus, Jesús Hernández sinalou que “Fronteiras 07 é o punto de arranque dunha serie de actividades que, impulsadas dende a vicerreitoría, desenvolveranse este outono”.

Hernández subliñou, na súa intervención, a gran riqueza do evento xa que “quen a impulsa é xente nova, con inquedanzas, que se move, comprende e comparte as súas experiencias culturais ”. Ademais, destacou que “esta iniciativa correspóndese cun dos eixes do plan estratéxico da Universidade que é unha maior relación con Portugal”.

Para Lola Dopico, concelleira de Cultura e Universidade, e gran coñecedora deste proxecto, “Fronteiras 07 converte a Pontevedra nun nodo de conexión de prácticas artísticas e medios de comunicación dun xeito moi achegado á realidade contemporánea e transfronteiriza”.

Pola súa banda, o xerente da Fundación Illa de San Simón, Xavier Méndez mostrouse aberto a suxestións promovidas por movementos asociativos, e avogou pola continuidade deste tipo de actividades relacionadas coa creación e a difusión cultural que “permiten seguir actualizando e desenvolvendo iniciativas do pobo”.

Nesa mesma liña, a delegada provincial de Cultura e Deporte, María Jesús López Escudero, amosou a súa satisfacción pola promoción de actividades desta categoría que ”axudan a vincular arte, ciencia e tecnoloxía coa sociedade”.

Programa
Ademais das residencias artísticas paralelas na Illa de San Simón e Nodar, Fronteiras 07 conta cun programa moi amplo de actividades que inclúen unha serie de conferencias e presentacións de proxectos, que se celebrarán os días 27 e 28 de setembro na Casa das Campás, e os 29 e 30 no Auditorio da Biblioteca Municipal de Barcelos en Portugal.
Como punto e final a esta iniciativa, a Sala X da Facultade de Belas Artes acollerá, do 2 de outubro ao 13 de novembro, unha exposición dos proxectos artísticos desenvoltos no ámbito do encontro. Co fin de mostrar os traballos resultantes no país veciño, esta mesma mostra viaxará o 20 de novembro ás Termas da San Pedro do Sul en Portugal.

O comezo do curso trae consigo a sexta edición do Programa de Maiores

Xa están abertos os prazos de preinscrición e matrícula

Co comezo das clases tamén botará a andar, un ano máis, o Programa para Maiores. Para esta sexta edición xa están abertos os prazos de preinscrición e matrícula, tanto para o ciclo intensivo como para o de especialización.

Esta iniciativa da Vicerreitoría de Formación e Innovación Educativa comezou no curso 2001-2002 co obxectivo de abrir as aulas da Universidade ás persoas maiores dándolles a oportunidade de iniciar ou completar a súa formación académica. Ao tempo, este programa pretende tamén facilitarlles a interacción social e fomentar unha mellora na súa calidade de vida.
Para os que se matriculan por primeira vez, xa está aberto o prazo de preinscrición, que se pechará o vindeiro 14 de setembro. A matrícula formalizarase entre o 1e 5 de outubro.

Pola súa banda, os alumnos do segundo e terceiro curso poden realizar directamente a matrícula, que está aberta dende o pasado 3 de setembro e ata o vindeiro día 14.

A matrícula no ciclo de especialización, no que os alumnos cursan as materias conxuntamente co resto dos universitarios, está aberta ata o vindeiro 13 deste mes. Ademais, a Vicerreitoría puxo en marcha unha ampliación deste programa que permite que os xa titulados poidan cursar materias soltas. Esta opción para os alumnos que rematen os dous ciclos xurdiu ante a demanda dos mesmos para poder seguir estudando. Para eles, a matrícula estará aberta os días 18 e 19 deste mes de setembro.

Comezo das clases
A data para o comezo das clases tamén é diferente segundo se trate do ciclo intensivo ou de especialización. Para o primeiro, que comprende os tres primeiros anos, está previsto que se inicien as clases o vindeiro 15 de outubro. Para o ciclo de especialización, os alumnos volverán ás aulas unhas semanas antes, o 24 de setembro, cando comece o curso na Universidade.

A Universidade abre o prazo de matrícula para o CAP

O Curso de Aptitude Pedagóxica impartirase nos campus de Pontevedra e Ourense

A vicerreitoría de Formación e Innovación Educativa manterá aberto, ata o vindeiro 11 de outubro, o prazo de inscrición do Curso de Aptitude Pedagóxica (CAP) para o ano académico 2007-2008. A súa realización permitirá, aos alumnos que o superen, impartir docencia nos niveis de Educación Secundaria Obrigatoria, Bacherelato e Formación Profesional Específica.

Os períodos de matriculación estrutúranse de xeito que, os estudantes con apelidos comprendidos do A ao N terán ata mañá de prazo para inscribirse, para os apelidos do O ao Z o intervalo será do 10 ao 14 de setembro e os casos especiais atenderanse os días 17 e 18 deste mesmo mes.

O CAP terá unha carga lectiva total de 15 créditos teórico-prácticos e desenvolverase a través de tres bloques: un común, independente da titulación de orixe do alumno, outro máis específico e un practicum, dedicado ás prácticas en centros de Secundaria e baixo a supervisión dun titor.

As clases, que se impartirán nos campus de Pontevedra e Ourense, comezarán o 8 de outubro na modalidade ordinaria e o día 19 na modalidade semipresencial.

Máis información

Os titulados do Programa de Maiores poderán continuar estudando materias soltas unha vez rematen a súa formación

A preinscrición para o primeiro curso xa está aberta

Co obxectivo de ofrecer ás persoas adultas un espazo formativo e de intercambio cultural e un ámbito de socialización, a Universidade continúa un ano máis co Programa para Maiores, que ten a preinscrición para o primeiro curso aberta ata o vindeiro 14 de setembro. Coa experiencia dos últimos catro anos, o vicerreitor de Formación e Innovación Educativa, Pedro Membiela, destaca “o interese e motivación dos estudantes e a satisfacción que amosan unha vez que toman parte nesta iniciativa, tanto eles como os docentes”.
O Programa para Maiores estrutúrase en dous ciclos. O primeiro, que consta de tres cursos, é un ciclo intensivo cunha docencia adaptada ás necesidades destes alumnos, mentres que no ciclo de especialización, comparten aulas e materias cos universitarios que cursan os seus estudos nas distintas escolas e facultadas. Ao rematar cada un destes ciclos os estudantes obterán un título propio: “graduado senior co ciclo intensivo e graduado superior co de especialización”, explica Membiela.
Nos tres primeiros cursos, a finalidade é facilitarlles unha docencia adecuada á súa situación persoal axudándolles no proceso de adaptación aos cambios dos novos tempos. Así, as materias específicas van dende a identidade psico-social da persoa adulta, as novas tecnoloxías, inglés, saúde e calidade de vida, dereito básico ou historia. As materias combínanse con obradoiros de música, expresión corporal ou fotografía.
Xa no ciclo de especialización as materias ofertadas están en relación coas titulacións que compoñen cada un dos tres campus podendo elixir entre unha ampla oferta.

Novidade
Ao finalizar o vindeiro curso 2007-2008 rematará o ciclo de especialización a primeira promoción deste programa obtendo o título de graduado superior. Para todos eles e, respondendo a unha demanda dos propios estudantes, o vicerreitor de Formación e Innovación Educativa anunciou como novidade “a posibilidade, unha vez rematados os estudos e obtido o título, de continuar formando parte da comunidade universitaria matriculándose en materias soltas das titulacións oficiais”. Segundo Membiela “este é un indicativo de que a xente está contenta e quere continuar, de que están motivados para seguir formándose na Universidade”. Como apunta o vicerreitor “os méritos do programa van en dúas direccións: ofertamos unha formación ampla cun compoñente cultural importante e un outras persoas, sempre están moi motivados no aspecto relacional e forman grupos moi unidos de alumnos e moi activos dentro e fóra das aulas. Neste sentido representa un compromiso persoal e de superación, xa que teñen que asistir regularmente a clase, aprender e traballar. É unha maneira de dar sentido a unha etapa da vida”.

Prazos
Ata o vindeiro 14 de setembro permanecerá aberta a preinscrición para os novos estudantes que se matriculen no primeiro curso, matrícula que farán efectiva entre o 1e o 5 de outubro. Para os estudantes de segundo e terceiro curso o prazo de matrícula abrirase do 3 ao 14 de setembro. Para o ciclo de especialización, cuarto e quinto curso, a matrícula debe formalizarse entre o 3 e o 13 de setembro. No que se refire á novidade para os titulados de cursar materias soltas, esta deberá realizarse os días 18 e 19 de setembro.

A especialización e a profesionalización centran a oferta complementaria da Universidade para o vindeiro curso 2007-2008

A Vicerreitoría de Formación e Innovación Educativa presentou o novo catálogo de curso

A especialización dos titulados e a formación continua dos profesionais son os obxectivos principais arredor dos que se artella a oferta de títulos propios e cursos complementarios da Universidade de Vigo para o vindeiro curso. Presentada o pasado venres 13 de xullo polo vicerreitor de Formación e Innovación Educativa, Pedro Membiela, e polos coordinadores de varios dos títulos, a oferta comprende másters, cursos de especialistas, cursos de formación e cursos complementarios.
Segundo salientou Pedro Membiela, “esta oferta propia da Universidade complementa ás titulacións oficiais aportando un fondo compoñente social, xa que recolle os intereses e necesidades dos distintos sectores, captando as necesidades formativas e específicas de cada un deles”.
Para poder responder tanto ás necesidades formativas como ás profesionalizantes, o profesorado destes cursos incluirá tanto a docentes universitarios como a representantes das propias empresas do sector e incluso da administración pública tanto galega, como estatal e europea.

Novidades
No que se refire aos másters e cursos de especialista, o catálogo inclúe varias novidades. Entre elas, o Máster en Ciencias da Enfermaría, o Curso de Especialista en Enfermaría de Urxencias, Emerxencias e Catástrofes e o Curso de Especialista en Dereito Angloamericano. O primeiro deles está dirixido a diplomados e licenciados da rama sanitaria para complementar a súa formación universitaria en conceptos científicos, xurídico-sociais, humanísticos e tecnolóxicos. Pola súa banda, o curso de Enfermaría de Urxencias, Emerxencias e Catástrofes xurdiu para paliar as carencias existentes neste campo e para poñer ao día aos diplomados en novos coñecementos e técnicas, sobre todo de cara a posibles catástrofes. O curso de especialista en Dereito Angloamericano especializará neste campo aos titulados, afondando en temas como a Common Law, o sistema xurídico continental europeo ou o dereito nos Estados Unidos.

Continuidade
A posterior incorporación laboral dos matriculados é segundo Membiela “a razón de ser destes cursos e a sucesión das edicións ratifica o éxito neste campo”, aínda que tamén destacou que aumenta constantemente o número de matriculados que xa son profesionais cualificados.
Entre os másters e cursos que repiten dentro da oferta cabe destacar o máster en Políticas Comunitarias, Desenvolvemento e Cooperación Transfronteiriza, coordinado por Luís Domínguez, que salientou que o obxectivo é “formar xestores das políticas e programas comunitarios da eurorrexión Galicia-Norte de Portugal”.
O Máster en Dereito Tributario vai xa pola súa segunda edición e conta coa colaboración, tanto en financiamento como en profesorado, da Consellería de Economía e Facenda, o Instituto de Estudos Fiscais e varios despachos profesionais. Baixo a coordinación da profesora Ana María Pita, este título propio está destinado a licenciados e profesionais que se dediquen á asesoría tributaria para actualizar os seus coñecementos ante os cambios da lexislación.
Dende o Departamento de Economía Aplicada, María Dolores Garza, dirixe o III Máster en Economía e Xestión da Pesca e da Acuicultura. Segundo salientou na presentación, “naceu a petición do sector pesqueiro e supón a resposta á necesidade da profesionalización”. Dirixido a titulados e traballadores desta industria ten unha orientación pluridisciplinar en campos como bioloxía, medio ambiente, recursos mariños...
Tamén repiten edición o Master en Ciencia e Tecnoloxía de Conservación de Produtos da Pesca, dirixido polo ex reitor, José Antonio Rodríguez; o Máster Curso de Especialista en Auditoría e Contabilidade; o Curso de Especialista en Seguridade Social, coordinado por Jaime Cabeza; e o V Curso de Especialista en Fisioterapia do Deporte, da man do director da escola, Gustavo Rodríguez. Segundo salientou este último, “foron os propios egresados da titulación os que, na avalicación da mesma, resaltaron a necesidade formativa no eido do deporte, un dos de máis saída profesional para os nosos estudantes”.

Na páxina web da Vicerreitoría de Formación e Innovación Educativa pódese consultar tanto os másters e cursos de especialista como a oferta completa de cursos complementarios e de formación.

Inauguración do VII curso complementario de Comunicación Corporativa

O protocolo como ferramenta de comunicación

As xornadas contan con máis de 200 alumnos inscritos

Un ano máis, a Facultade de Ciencias Sociais e da Comunicación, convértese nun punto de encontro de expertos nacionais e internacionais en materia de protocolo. Todos eles, achegarán, ao longo de dúas xornadas, os seus coñecementos e experiencias nesta sétima edición do xa tradicional curso sobre Comunicación Corporativa e Protocolo que foi inaugurado esta mañá no campus.

Dirixido polo profesor Fernando Ramos, o curso conta, como sinalou o decano do centro, Alberto Pena, “cunha gran aceptación e éxito por parte do público”. Mostra disto son os máis de 200 inscritos, entre os que se atopan alumnos das tres universidades galegas e estudantes de diversas rexións de España e Portugal.

Baixo o título “Protocolo e protocolos para a comunicación de empresas e institucións: as ferramentas da excelencia”, as xornadas, responden a unha formación de carácter complementaria na que, como apuntou o seu organizador, “a Universidade proxecta o coñecemento cara a sociedade”.

Ramos subliñou, ademais, que no curso se entende o protocolo non só na súa acepción de “cerimonial”, senón máis ben como “unha ferramenta comunicativa para favorecer a imaxe pública de empresas e institucións”.

Para o director xeral de Comunicación Audiovisual da Xunta de Galicia, Manuel Fernández, “o protocolo adquire, cada vez, unha maior importancia na nosa sociedade e, neste mundo tan globalizado, é fundamental un responsable que faga as relacións o máis fácil posible”.

A conferencia inaugural correu a cargo de Isabel Amaral, presidenta da Asociación Portuguesa de Estudos de Protocolo, quen analizou o protocolo institucional na empresa dende a perspectiva lusa. A relatora fixo un percorrido polo protocolo de Estado dende 1868 ata a actualidade e apuntou que no seu país este cerimonial é responsabilidade dun servizo de Protocolo de Estado que está en mans de representantes da sociedade e que “entre as súas competencias está definir as regras que deben presidir ao ritual, etiqueta e pragmática de acordo coas prácticas internacionais e coas tradicións do Estado portugués ”.

Ademais, ao longo desta xornada analizáronse, entre outros aspectos, as estratexias, os protocolos de actuación para a comunicación en crise, o valor monetario da excelencia ou os novos modelos e soportes para a información institucional.

Xoves

A xornada de mañá contará coa presenza de convidados de auténtico luxo. Ás 9.45 horas Juan Carlos Gafo e Alfredo Rodríguez, directores de protocolo da Presidencia do Goberno e do Ministerio de Defensa respectivamente, debaterán se é preciso a reforma do Real Decreto de Precedencias do Estado. A continuación, o profesor Fernando Ramos fará un breve apunte sobre a necesidade dun Estatuto para o Príncipe Felipe.

Unha análise sobre a cultura xerada polo viño de Oporto dende as perspectivas portuguesa e británica, centrará a seguinte conferencia ás 11.30 horas. Os relatores serán Manuel Cabral, director da Presidencia da Cámara Municipal do Porto, e o británico George Hall, consultor de comercio internacional.

O seguinte panel, ás 13.00 horas, buscará trazar o perfil do director da comunicación no século XXI e contará, para isto, coa presenza de expertos como Luís Ángel Sanz, Valentín Martínez ou Alejandro Kowalski.

Xa na sesión da tarde, as conferencias centraranse no protocolo e imaxe institucional nas Cortes de Aragón, os servizos exteriores da Universidade Pública, e por último, o rol dos Consellos Sociais na imaxe dos centros de educación superior. O acto de clausura terá lugar ás 19.45 a cargo de Fernando Ramos, organizador das xornadas.

Unhas xornadas de cine

Baixo o título Curtas.gz nacen, de mans dos propios estudantes universitarios, organizados nos Comités Abertos de Facultades (CAF), e do Cineclube da Facultade de Ciencias Sociais e da Comunicación, unhas xornadas que pretenden pór en valor a historia da curtametraxe en Galicia e, á vez, motivar aos alumnos no o seu desenvolvemento profesional.
Na presentación do acto, o vicerreitor de Relacións Institucionais, Iván Area, felicitou o labor realizado polos membros dos CAF, non só na organización destas xornadas, senón tamén no gran número de actividades que están a realizar en toda a Universidade e que “perseguen unha formación integral do alumnado, máis alá do estritamente académico”. Area apuntou tamén que esta iniciativa serve “para reivindicar e demostrar que no noso país existe unha gran creatividade, aínda que moitas veces se pase por alto”.
Pola súa banda, Ana Belén Fernández, directora de area de Extensión Universitaria e Estudantes do campus de Pontevedra, amosou o apoio co que contan este tipo de proxectos estudantís e definiu como propósito da vicerreitoría do campus “promover actividades de calidade propostas polo alumnado”.
Curtas.gz son unhas xornadas que, como sinalou o responsable dos CAF, “están feitas por e para os estudantes”, e que pretende, ao longo de dous días, afondar na historia do curtametraxismo en Galicia. A programación busca dar a coñecer a súa xénese e evolución, dende os seus inicios ata o cinema afeccionado dos anos 70 e 80, así como servir de punto de encontro para o debate en torno á realización de curtas na actualidade e tamén, reivindicar a necesidade dun cinema propio como símbolo da vitalidade cultural da nosa comunidade. Nese senso, o coordinador das xornadas, Bernal Rúa, fixo unha pequena reflexión sobre os grandes impedimentos cos que as curtas se tiveron que enfrontar nos seus inicios: “hai máis de 30 anos un grupo de intrépidos mozos amosou que era posible un cinema galego, para isto tiveron que loitar contra moitas dificultades propias do seu tempo e da discriminación” . Ademais Rúa, avogou pola necesidade de seguir creando historias e apuntou que “debemos ser críticos coa situación actual e demostrar que a nosa lingua no cine é tan válida como calquera outra”.

Políticas Culturais

Ademais da charla sobre a integración de Turquía na Unión Europea, a Facultade de Ciencias Sociais e da Comunicación contou, nesta xornada, coa participación do Doutor en Ciencia Política da Universidade de Montpellier, Enmanuel Negrier, quen falou sobre as políticas culturais nas áreas metropolitanas de Francia.

A charla, organizada pola Área de Socioloxía contou coa presenza dos profesores Xoán Bouzada e Xesús Laxe. Ambos docentes destacaron a importancia que este tipo de políticas están adquirindo hoxe en día para os expertos en Publicidade e Relacións Públicas: “é un viveiro laboral para os profesionais das titulacións que aquí se imparten”, subliñou Bouzada.

O relatorio de Negrier afondou na territorialidade e planificación da cultura en Francia. Este tipo de políticas teñen, como sinala o experto “unha historia de 47 anos e o seu nacemento se explica pola unión de cultura e estado do benestar ”.

Negrier explicou tamén aos asistentes os debates que, con respecto a esta materia, se están a suscitar actualmente en Francia. O primeiro deles é o de territorialidade, que se centra nas modalidades de intervención do Estado, así como o papel que desenvolven os poderes rexionais, provinciais, municipais ou metropolitanos na xestión da cultura. O segundo debate é sobre os procedementos, concibidos de xeito unilateral ou bilateralmente: “trátase de compartir ou non o financiamento ”. E xa por último, o conflito sobre as finalidades: “se as políticas culturais se xustifican por si mesmas ou se están ao servizo doutros obxectivos públicos”, sinalou o experto, quen concluíu a súa charla optando por unha postura intermedia, “o futuro da política cultural está en cruzar o compromiso entre ambas finalidades”.

Europa vista polos expertos

Charlas sobre a ampliación da UE e as políticas culturais

A posible integración de Turquía na Unión Europea centrou o debate nunha das conferencias que se celebrou esta mañá, na Facultade de Ciencias Socias e da Comunicación.

O profesor do departamento de Ciencia Política e da Administración, Celso Cancela, foi o encargado impartir a charla na que se trazou, ademais dun perfil do país asiático, as vinculacións históricas co Estado Europeo e as actuais posturas dos membros da UE ante a súa posible adhesión.

A conferencia formaba parte dun ciclo que, con motivo do 50 aniversario da firma do Tratado de Roma, e baixo o título “A integración europea a debate”, pretende achegar aos tres campus universitarios as opinións de expertos nesta materia.

No seu relatorio Cancela explicou aos asistentes a actual situación política do país: “nestes momentos é moi delicada, as recentes intervencións militares poden afectar de xeito moi negativo ás negociacións”. Ademais, sinalou o docente, “tampouco lle axudan moito políticos que, como Sarkozy, empregan á súa oposición á adhesión como baza electoral”.

No que se refire á economía, a realización de continuas reformas manten o seu desenvolvemento e estabilidade: “segundo a OECD, o país conta cun crecemento de arredor do 5-6% no que levamos de década e unha inflación por debaixo do 10%, o que supón todo un éxito”, sinalou Cancela.

O debate tamén se centrou nas posicións dos distintos membros da UE en canto á integración do estado turco. Por unha banda, países conservadores como Alemaña, Austria ou Francia amosan abertamente a súa postura contraria: “apostan por outro tipo de vinculación, pero sen converter a Turquía en membro de pleno dereito”, matizou o relator. Entre os principais motivos para a súa oposición están a emigración masiva e descontrolada que a ampliación pode carrear.

Unha gran poboación de 71 millóns de habitantes cun potencial de desenvolvemento relativamente alto e un incremento da seguridade, son os principais fundamentos de países que, como Reino Unido, España, Portugal, Italia ou Grecia se mostran favorables. E tamén, aínda que non pertence á UE, destaca como gran defensor Estados Unidos: “para el o ideal sería que o territorio OTAN coincidira co da Unión Europea”, apuntou Cancela. O profesor sinalou, ademais destes beneficios, toda unha serie de valores que comparte co estado europeo e que o fan merecedor da integración. Para o docente “Turquía puxo diante un debate que nunca antes se dera: que é Europa?, que é a identidade europea?, que nos define?”.

Curtas.gz, un percorrido pola historia da curtametraxe en Galicia

Os días 14 e 15 de maio na Facultade de Ciencias Sociais e da Comunicación

Afondar no coñecemento do curtametraxismo en Galicia e crear un punto de encontro para o debate. Estes son os principais obxectivos de Curtas.gz, unhas xornadas que nacen a partir da iniciativa do estudantado organizado nos CAF (Comités Abertos de Facultade) e o Cinecuble da Facultade de Ciencias Sociais e da Comunicación.

A actividade, que terá lugar os vindeiros 14 e 15 de maio, conta co apoio das vicerreitorías do campus de Pontevedra, de Relacións Institucionais e de Extensión Cultural e Estudantes, así como do Concello da cidade.

Na presentación das xornadas, Jesús Hernández, vicerreitor do campus pontevedrés, destacou o alcance da iniciativa e apuntou que “na medida do posible imos a apoiar propostas do alumnado que teñan certo rigor e calidade, condicións que se dan de xeito evidente neste proxecto”.

Curtas.gz pretende tamén servir de punto de arranque para a promoción dun maior número de actividades relacionadas coa titulación de Comunicación Audiovisual que, como sinalou Hernández, “precisan dun maior fomento”.

Ao longo de dúas xornadas, Curtas.gz percorrerá a historia do curtometraxismo en Galicia, dende o seu nacemento ata a actualidade. “É importante coñecer as súas orixes no cinema mudo, xa que por aquel entonces non existía o concepto de curtametraxes como un formato, a súa produción estaba sometida ás limitacións técnicas”, apuntou Bernal Rúa, coordinador da iniciativa.

Antonio Simón, Miguel Castelo, Ramiro Ledo ou Xavier Villaverde, serán algúns dos numerosos profesionais do sector que se achegarán ata a Facultade de Ciencias Sociais e da Comunicación para compartir cos asistentes a súa experiencia e traxectoria neste eido.

Ademais de charlas e mesas redondas, nas sesións proxectaránse clásicos da curtametraxe galega como “Mamasunción” de Chano Piñeiro, “O pai de Migueliño” de Miguel Castelo e diversos traballos de directores noveis.

Matrícula

As xornadas, dotadas cun crédito de libre configuración, son de carácter aberto e gratuíto para a comunidade universitaria. Todos aqueles interesados en participar poderán inscribirse enviando a súa solicitude ao correo electrónico curtas.gz@gmail.com.

Máis info en http://curtasgz.blogspot.com/

Ciclo de relatorios

Comeza o ciclo de relatorios “50 aniversario do Tratado de Roma: a integración europea a debate”

Organizado pola Vicerreitoría de Relacións Institucionais e o Centro Europeo de Excelencia

Con motivo do 50 aniversario do Tratado de Roma, asinado o 25 de marzo de 1957, a Vicerreitoría de Relacións Institucionais e o Centro Europeo de Excelencia, organizaron o ciclo de relatorios “A integración europea a debate” que achegará aos tres campus da Universidade destacados expertos no ámbito da Unión Europea.

“A iniciativa pretende conmemorar o aniversario do que foi a pedra fundamental da actual UE. Naquel momento asináronse en Roma dous tratados que daban existencia á Comunidade Económica Europea, CEE, e a Comunidade da Enerxía Atómica”, sinala o profesor Celso Cancela, coordinador do ciclo.

As xornadas darán comezo mañá no campus de Vigo cun debate sobre o futuro da UE tras o fracaso da Constitución. Para analizar o tema contarase coa presenza de Carlos Closa, profesor de Ciencia Política e da Administración e subdirector xeral de Estudos e Investigación do Centro de Estudos Políticos e Constitucionais. Será ás 12:30 horas no salón de graos da Facultade de Ciencias Económicas e Empresariais.

“O impacto da Unión Europea no ordenamento español” é o tema elixido para a xornada do mércores nove de maio. Noemí García, profesora de Dereito Constitucional e Titular dun módulo Jean Monnet da Universidade será a encargada de falar sobre o tema.

Francisco Aldecoa, catedrático de Ciencia Política e da Administración e Titular dunha Cátedra Jean Monnet da Universidade Complutense de Madrid, é a persoa elixida para impartir un relatorio sobre o rescate substancial do Tratado de Constitución para Europa.

Estes dous últimos relatorios celebraranse no salón de graos da Facultade de Ciencias Xurídicas e do Traballo, o primeiro o 9 de maio ás 11:00 horas e o segundo o día 11 ás 12:00 horas.

Pontevedra

O campus de Pontevedra está presente neste ciclo de relatorios coa conferencia “A ampliación da UE: con ou sen Turquía”, que impartirá o profesor Celso Cancela na Facultade de Ciencias Sociais e da Comunicación o vindeiro 10 de maio ás12:00 horas. Cancela é docente do departamento de Ciencia Política e da Administración e Titular dun Módulo Jean Monnet da Universidade de Vigo.

Ourense

“Os límites da acción exterior da UE: a política europea de veciñanza” e “Quen teme a Constitución Europea” son os relatorios que se van impartir no campus de Ourense e, máis concretamente, no salón de graos da Facultade de Dereito.

A primeira conferencia será o 13 de maio ás 12:00 horas e para ela contarase coa presenza de Belén Sánchez, profesora de Dereito Internacional Público e Relacións Internacionais e Titular dun Módulo Jean Monnet da Universidade de Vigo. Namentres, a segunda das conferencias será o 15 de maio ás 17:00 horas. Francesc Morata, catedrático de Ciencia Política e da Administración, Titular dunha Cátedra Jean Monnet e director do Instituto Universitario de Estudos Europeos da Universidade Autónoma de Barcelona, é a persoa elixida para impartir esta conferencia.

Os novos titulados en Ciencias Sociais e da Comunicación celebran o seu acto de graduación

A Facultade de Ciencias Sociais e da Comunicación celebrou o pasado luns, 30 de abril, a festividade da súa patroa, Santa Catalina de Siena, co solemne acto de graduación no que se fixo entrega de diplomas á IX promoción de licenciados en Publicidade e Relacións Públicas, á II en Comunicación Audiovisual e á V promoción de diplomados en Xestión e Administración Pública.
O acto, que estivo presidido polo vicerreitor do campus de Pontevedra, Jesús Hernández, contou coa presenza de Iván Area, vicerreitor de Relacións Institucionais; Alberto Pena, decano da Facultade de Ciencias Sociais e da Comunicación e Emma Torres, secretaria do centro.
No seu discurso, Hernández animou a tódolos recen titulados a iniciar con ilusión a súa andaina profesional: “saíde fóra sen medo e non desesperedes nas vosas primeiras experiencias laborais”. Ademais, recordoulles que “nesta aventura contades co apoio incondicional da Facultade xa que sodes o espello do noso traballo”, apuntou o vicerreitor do campus de Pontevedra.

Pola súa banda, o decano do centro, Alberto Pena destacou o papel que a Universidade xoga non só na formación académica dos seus estudantes, se non tamén no seu desenrolo persoal: “queremos formar persoas que, por enriba de todo, saiban comprenderse a si mesmas e aos demais nunha sociedade, cada vez, máis cambiante”. Pena tamén subliñou no seu discurso que “o paso por esta institución non garante un futuro de éxito, para elo, é preciso que asumades o compromiso de seguir aprendendo cada día”.
Ademais, no transcurso do acto rendéuselle un sentido homenaxe ao intelectual Isaac Díaz Pardo coa entrega, por parte do vicerreitor do campus de Pontevedra, da insignia de ouro. “É un recoñecemento ao seu traballo como xestor cultural, sen el moitas cousas que acontecen en Galicia non se entenderían”, apuntou o decano do centro, quen subliñou tamén que “é un home de firmes conviccións, que soubo recordar sen rancor e lembrar para non esquecer”.

Bolseiros de honra
A xornada completouse coa imposición das Bolsas de Honra a Antonio de Cora García, conselleiro executivo do Diario de Pontevedra; Jesús Iglesias Díaz, director da TVG e Antonio Izquierdo Escribano, director da Escola Galega de Administracións Públicas (EGAP). Personaxes, todos eles, moi relacionados coa Facultade e, como apuntou Alberto Pena, “un exemplo a seguir por todos nós”.

Ciclo de conferencias sobre Filgueira Valverde

Ramón Villares clausurou o ciclo de conferencias sobre Filgueira Valverde

O papel que desempeñou Filgueira Valverde nas principais institucións culturais galegas foi o tema central da conferencia que impartiu o pasado mércores, na Facultade de Ciencias Sociais e da Comunicación, Ramón Villares, presidente do Consello da Cultura Galega.

Esta conferencia supuxo o punto e final a un ciclo que, baixo o título “Filgueira Valverde: historiador, político e intelectual”, naceu co obxectivo de afondar na figura do polígrafo pontevedrés. A actividade, organizada pola Área de Ciencia Política e da Administración, contou coa presenza do vicerreitor de Relacións Institucionais, Iván Area, e do profesor Celso Cancela.

Na charla, Villares destacou a precocidade e madurez do intelectual e apuntou que a súa traxectoria se podía encadrar en tres grandes planos: como historiador, como político e como home de saber.

O primeiro deles, “como autor dunha ampla e diversa obra afrontou terreos que van dende a literatura ata a antropoloxía”, sinalou o relator. En segundo lugar, destacou que “Filgueira adaptou a súa idea de defensa da cultura galega aos distintos contextos, ben como figura do partido galeguista, ben como personaxe que convive co réxime e que se adapta ao modelo da transición”.

E, nun terceiro plano, Villares remarcou a súa faceta como “empresario da cultura” e apuntou que “Filgueira estivo presente nas grandes iniciativas culturais galegas do século XX”. Neste punto, o presidente do Consello da Cultura Galega afondou no papel que desenvolveu o intelectual pontevedrés en institucións como o Seminario e o Instituto de Estudos Galegos así como no Consello da Cultura Galega ou en iniciativas como a creación do Museo de Pontevedra ou da Real Academia Galega.

Villares concluíu a súa charla facendo alusión ao papel decisivo que Filgueira tivo nos principais organismos culturais galegos e recordando que “foi unha persoa que naceu para e por a cultura, e toda Galicia ten dereito a sentilo como propio”.

Os estudantes da Facultade de Ciencias Sociais e da Comunicación visitarán o Parlamento de Galicia

O vindeiro xoves, día 26 de abril, estudantes das titulacións de Xestión e Administración Pública, Publicidade e Relacións Públicas e Comunicación Audiovisual realizarán unha visita institucional ao Parlamento de Galicia en Santiago de Compostela. Alí visitarán as diversas dependencias e recibirán información acerca do funcionamento da Cámara representativa dos cidadáns galegos e, así mesmo, terán un encontro con membros dos tres Grupos Parlamentarios no que poderán realizar as cuestións que estimen oportunas.
A visita, organizada pola Área de Ciencia Política e da Administración, supón un complemento á formación académica e pretende axudar a unha mellor comprensión dos conceptos teóricos impartidos en materias como Sistema político galego, Sistemas de partidos e sistemas electorais ou Historia do Pensamento político.